ქუთაისის საქალაქო სასამართლოში ორ საათზეა მეტია "საქნახშირის" ექვსი დაკავებული თანამშრომლის სასამართლო პროცესი მიმდინარეობს.
წინასასამართლო სხდომაზე დაცვის მხარემ მტკიცებულებების დაშვების შუამდგომლობა დააყენა.

რამდენიმე წუთის წინ სხდომაზე შესვენება გამოცხადდა. როგორც ერთ-ერთი დაკავებულის, გოჩა ქასრაშვილის ადვოკატი, გიორგი ლეკიშვილი ამბობს, პროცესის განახლების შემდეგ, სასამართლო უკვე ბრალდების მხარის შუამდგომლობაზე იმსჯელებს, რომლის მიხედვითაც პროკურატურა დაცვის მხარის მიერ წარდგენილი მტკიცებულებების დაუშვებლობას ითხოვს.

"საქნახშირის" ექვსი თანამშრომელი 6 აგვისტოს დააკავეს. გამოძიება მათ სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას ედავება, რამაც ადამიანის სიცოცხლის მოსპობა გამოიწვია. საქმე 2018 წლის 5 აპრილს შახტში მომხდარ შემთხვევას ეხება, რა დროსაც 6 ადამიანი დაიღუპა და სამი დაშავდა.

ბრალის დამტკიცების შემთხვევაში დაკავებულებს ორიდან ხუთ წლამდე პატიმრობა ემუქრება.

ამავე თემაზე:

"საქნახშირის" თანამშრომლებისთვის წინასწარი პატიმრობის შეფარდება ადვოკატებმა გაასაჩივრეს

სასამართლომ "საქნახშირის" თანამშრომლებს პატიმრობა შეუფარდა

"საქნახშირის" დაკავებული თანამშრომლების ადვოკატები გირაოს შეფარდებას მოითხოვენ