კინო "საქართველო" ფილმს "მონაზვნის წყევლა" ქართულად არ გაახმოვანებს და მას მხოლოდ ინგლისურ და რუსულ ენაზე აჩვენებს.

კინო "საქართველოს" წარმომადგენელმა ქუთაისიპოსტთან საუბარში ვერ დააკონკრეტა თუ რატომ არ გახმოვანდება "მონაზვნის წყევლა" ქართულად.

"ზოგადად ფილმების ნაწილი ყოველთვის იქნება რუსულად, ნაწილი - ქართულად. ეს ფილმი ქართულად ვერ იქნება", - აღნიშნა კინო "საქართველოს" ერთ-ერთმა თანამშრომელმა.

თუმცა, სოციალურ ქსელში გაკეთებულ განცხადებაში, რომელიც კინოს ადმინისტრაციამ გამოაქვეყნა, აღნიშნულია, რომ ფილმი სარწმუნოებას აკნინებს და შეურაცხყოფას აყენებს მას.



"ქუთაისიპოსტი"  შეეცადა გაეგო ჰქონდა თუ არა ვალდებულება კინო "საქართველოს" ფილმი ქართულად გაეშვა, თუ ქართულ ენაზე გახმოვანებული ფილმი რელიგიურ გრძნობებს შეურაცხყოფას აყენებს, რუსულად და ინგლისურად თარგმნილი გამოიწვევდა თუ არა იგივეს, თუმცა გვითხრეს, რომ ამ კითხვებზე პასუხის გაცემისთვის კომპეტენტური პირი ადგილზე არ იმყოფება და არ იცოდნენ როდის შეძლებდა ის პასუხის გაცემას. 

"მონაზვნის წყევლა" საშინელებთა ჟანრის ფილმია. რეჟისორი კორინ ჰარდია. მისი ჩვენება დღეს თბილისის კინოთეატრებშიც არის დაგეგმილი. თუმცა ქუთაისისგან განსხვავებით, ფილმი რუსულ და ინგლისურთან ერთად ქართულ ენაზეც გავა. ფილმი რუმინეთში მონაზვნის თვითმკვლელობის ამბავს ეხება. მიზეზის გასაგებად კი,  ვატიკანმა  მღვდელი და ახალგაზრდა მონაზონი გამოაგზავნა, რათა გაიგონ რუმინეთში მონაზვნის თვითმკვლელობის მიზეზი.