შინაგან საქმეთა სამინისტრომ ქუთაისის საკრებულოს დეპუტატის, გია უკლებას ცემის ფაქტზე გამოძიება დაიწყო.
უწყების მიერ გავრცელებულ განცხადებაში ნათქვამია, რომ დაპირისპირებაში მონაწილე პირები გამოკითხვაზე უკვე დაიბარეს.

"მიმდინარე წლის 19 სექტემბერს ქუთაისში, მერიის შენობაში, საკრებულოს სხდომის დაწყებამდე პარტია "ქართული ოცნების" წარმომადგენლებსა და პარტია "ნაციონალური მოძრაობის" წევრებს შორის მომხდარ ფიზიკური დაპირისპირების ფაქტზე გამოძიება დაიწყო.
გამოძიება საქართველოს სისხლის სამართლის კოდექსის 126 -ე მუხლით მიმდინარეობს, რაც ძალადობას გულისხმობს.

პოლიციამ გამოკითხვაზე დაიბარა დაპირისპირებაში მონაწილე ორივე მხარე. ამ დროისთვის მიმდინარეობს ინტენსიური საგამოძიებო მოქმედებები",- ნათქვამია უწყების განცხადებაში.

ქუთაისის საკრებულოს დეპუტატს, გია უკლებას უმრავლესობის წევრებმა 19 სექტემბერს სცემეს. დაპირისპირება თავდაპირველად მასსადა"ქართული ოცნების" დეპუტატს, იმედა საღინაძეს შორის დაიწყო, რის შემდეგაც ხელჩართული ჩხუბი დერეფანში გაგრძელდა. უკლებას მმართველი გუნდის რამდენიმე დეპუტატი სცემდა. მათ შორის კახა ბოჭორიშვილი, ნიკოლოზ ჩეჩელაშვილი და ამირან კოპალეიშვილი. ასევე, მერიისა და საკრებულოს აპარატის თანამშრომლები.

ფიზიკური დაპირისპირების შედეგად გია უკლებას სახის არეში დაზიანებები აქვს მიყენებული.

გია უკლებას ცემის ფაქტს გამოეხმაურა გაერთიანებული ოპოზიცია "ძალა ერთობაშიას" პრეზიდენტობის კანდიდატი გრიგოლ ვაშაძე, რომელმაც "ნაციონალური მოძრაობის" ქუთაისის ორგანიზაციის ოფისში საგანგებო ბრიფინგი გამართა.


ამავე თემაზე: 

ჩხუბი და დაპირისპირება ქუთაისის საკრებულოში (ვიდეო)

ქუთაისის საკრებულოს ნაცემი დეპუტატი

საკრებულოში "ქუთაისიპოსტის" ჟურნალისტებს საქმიანობაში ხელი შეუშალეს (ვიდეო)