რა გავლენას ახდენს ნეოლიბერალური წესრიგი გენდერულ კონსტრუცქციებზე და როგორია მისეული გაგება ქალთა როლის თუ მონაწილეობის მსგავს სოციო-ეკონომიკურ სისტემაში.

ქუთაისში არსებულ კატო მიქელაძის სკოლაში აღნიშნულ თემაზე სემინარი გაიმართა.

შეხვედრა მერიის გენდერის დარბაზში მოეწყო, სადაც მოხსენება ადამიანის უფლებათა სწავლების და მონიტორინგის ცენტრის მკვლევარმა - თამარ ქებურიამ წაიკითხა.

მან საუბრის დასაწყისში ნეოლიბერალიზმის არსზე ისაუბრა. სისტემაზე, რომელიც 1970 წლებიდან იღებს სათავეს.

როგორც ცნობილია იგი ამცირებს სახელმწიფოს როლს ქვეყნის ეკონომიკურ პოლიტიკაში. ეს მოდელი განსაკუთრებით კარგად მესამე სამყაროს ქვეყნებში აამუშავეს. მთავრობებმა დააწესეს ნეოლიბერალური  სტანდარტები: თავისუფალი ვაჭრობა, ნაკლები რეგულაციები, მთავრობის ნაკლები ჩარევა ეკონომიკურ პოლიტიკაში, მთლიანად ბაზრის ლოგიკაზე გადაწყობა.

ეს მოდელი შეიჭრა სხვა სივრცეებშიც.

"ახალგაზრდა ქალები გადაიქცნენ ნეოლიბერალური სისტემის წარმატებული ფუნქციონირებისთვის მნიშვნელოვან აგენტებად, ამ სისტემამ შეცვალა ქალთა სუბიექტურობის გაგება და მოახდინა მათი ობიექტივიზაცია", -აღნიშნა თამარ ქებურიამ.

ქალს სხვადასხვა როლი ეკისრებოდა სხვადასხვა ეპოქაში. მიეწებებოდა იარლიყები, რომელსაც პოლიტიკური ველი და სისტემა აწესებდა იმის მიხედვით, თუ რა ესაჭიროებოდა ქალისგან. თუმცა, მე 19 საუკუნიდან იწყება ქალთა მოძრაობები. ამ ბრძოლამ გამოიღო შედეგი. ქალებმა მოიპოვეს უფლებები.

შეხვედრაზე ახსენეს კამპანია Me Too, რომელმაც ბევრი რამ შეცვალა, ერთგვარი კონცენტრაცია და მთელი ყურადღება ქალების გარშემო შემოკრიბა.

"თითქოს კამერები ქალებისკენ არის მომართული - რას ვიზამთ, როგორ შევცვლით სამყაროს. მაგრამ ეს შემობრუნება არა ქალების დამსახურებაა, არამედ იმ ლოგიკის, რასაც ნეოლიბერალიზმი გვთავაზობს", - აღნიშნა თამარ ქებურიამ.

ნეოლიბერალიზმი ადამიანებს მოხმმარებელ საზოგადოებად აქცევს. მის ლოგიკას ექვემდებარება ემანსიპირებული ქალებიც, თავად იქცევიან მომხმარებლებად, მიყვებიან იმ თამაშის წესებს, რასაც სისემა თავაზობს. მაგალითად, ძლიერი და დამოუკიდებელი ქალები იყენებენ უფრო სუსტ და ეკონომიკურად ღარიბი ქალების შრომას.

„თუკი ადრე ფემინსიტები იყვენენ გაბრაზებულები და ცდილობდნენ უუფლებობით შექმნილი ბარიერები გაერღვიათ, ახლა აღარვინ არის გაბრაზებული და დაბოღმილი, მათ უბრალოდ უნდათ კარგი ცხოვრება. საქორწინო კაბასაც ჩაიცვამენ, პორნოსაც უყურებენ, სხვადასხვა ურთიერთობებშიც შევლენ და მაინც ფემინისტებად დარჩებიან. დღევანდელ საზოგადოებაში ქალის ეს მახასიათებელიც გაჩნდა“ -აღინიშნა შეხვედრაზე.

ძლიერი ქალები, გინდა არ გინდა, ქმნიან მაღალ უთანასწორობას და ქმნიან მეორე პოლუსს წარუმატებელი ქალებისთვის, რომელთაც არ უნდა ამ ლოგიკაში ყოფნა. არ უნდათ კარიერა, ურჩევნიათ ბედნიერი ოჯახი, ქმარ -შვილზე ზრუნვა. ამ ქალებს სისტემის ლოგიკა წარმოაჩენს პასიურ, სუსტ, დამოკიდებულ ქალებად. მაგრამ, იქნებ მათ აქ ურჩევნიათ, ზრუნვის სივრცეში და არა ველურ, კაპიტალისტურ სივრცეში შესვლა, აღინიშნა სემინარზე.

შეხვედრ დისკუსიის რეჟიმში მიმდინარეობდა.