ქუთაისში დავითი და კონსტანტინეს ქუჩაზე არსებული რიონისპირა სახლი, რომელიც კულტურული მემკვიდრეობის ძეგლია სასტუმროდ გადაკეთდება.
სახლი, რომელსაც ქალაქში მრავალწლოვანი ვარდისფერი მაგნოლიის ხის გამო იცნობენ, კერძო საკუთრებაშია.

სასტუმროს მოწყობის მიზნით სახლის რემონტი სწორედ მესაკუთრემ დაიწყო.



ქუთაისის მერიის არქიტექტურის სამსახურში აცხადებენ, რომ კულტურული მემკვიდრეობის ძეგლის სტატუსის მქონე სახლში რეაბილიტაცია შეთანხმების საფუძველზე, ყოველგვარი წესის დაცვით მიმდინარეობს. 

"ის სახლი კერძო საკუთრებაა და მეპატრონეზე მშენებლობის ნებართვა გასცა კულტურული მემკვიდრეობის დაცვის ეროვნულმა სააგენტომ. როგორც ვიცი, სახლის რეაბილიტაცია მნიშვნელოვნად არ შეცვლის მის იერსახეს," -  ამბობს ქუთაისის მერიის არქიტექტურის სამსახურის ხელმძღვანელი ზაზა ჩხიკვაძე.

სახლის სასტუმროდ გადასაკეთებლდ უკვე დაწყებულია სარეკონსტრუქციო სამუშაოები, რომელსაც შპს "მაგნოლია" ახორციელებს.

ადგილზე დასაქმებული მუშების ინფორმაციით, მშენებლობა 8 თვეში დასრულდება. 




ადგილობრივების ინფორმაციით, დავითი და კონსტატინეს ქუჩის N 8 სახლი მეპატრონეებმა 1975 წელს გაყიდეს, მას შემდეგ ობიექტით სხვადასხვა დაწესებულებები სარგებლობდა.

"აქ იყო კულტურული მემკვიდრეობის სააგენტოს ოფისი, ავტოსკოლა, შემდეგ დიდი ხანი მიტოვებული იყო. ეს სახლი ყველასათვის განსაკუთრებულია იმ ხის გამო, რომელიც ეზოში დგას, ალბათ ამ ხეს არასდროს, არავინ მოჭრის, ან ამოთხრის," - ამბობენ ადგილობრივები.


ცნობილი მაგნოლიის ხე N 8 სახლიდან

დავითი და კონსტანტინეს ქუჩის N8-ში მდებარე სახლის მსგავსად, რეკონსტრუქცია რიონისპირას სხვა სახლებსაც ჩაუტარდებათ. ამ შემთხვევაში ქუთაისის მერიის ინიციტივით. 

მერიის არქიტექტურის სამსახურის ინფორმაციით, რეაბილიტაციის დასაწყებად, დოკუმენტაციების მომზადება დასრულების ეტაპზეა და მალე კონკურსი გამოცხადდება. თუმცა, დაზუსტებულ ვადები ჯერჯერობით უცნობი რჩება. 

ქუთაისში, რიონისპირა სახლების რეკონსტრუქციის პროექტი ითვალისწინებს სახლების რეკონსტრუქციას რიონის ორივე სანაპიროზე: ჯაჭვის, რუსთაველისა და წითელი ხიდების მიმდებარედ.

პროექტის ფარგლებში სულ 70-მდე სახლი უნდა აღდგეს. სამუშაოებს 2 დან 3 წლამდე ვადა დასჭირდება.

ამავე თემაზე:

ქუთაისში რიონისპირა სახლების რეაბილიტაციის პროექტი მზადდება

რიონისპირა სახლები განახლების მოლოდინში (ვიდეო)

ქუთაისში რიონისპირა სახლებს რეკონსტრუქცია ჩაუტარდება