"საერთაშორისო გამჭვირვალობა-საქართველომ" იმერეთის სამ მუნიციპალიტეტში - ვანში, ტყიბულსა და სამტრედიაში თანამდებობის პირების ქონებრივი დეკლარაციების მონიტორინგის შედეგები გამოაქვეყნა.
კვლევის შედეგად გამოკვეთა თანამდებობის პირების მიერ მათი და მათი ოჯახის წევრების ბიზნესაქმიანობის დამალვის მცდელობა და თანამდებობასთან შეუთავსებელი საქმიანობა.

კვლევის მიხედვით, საკუთარი ბიზნესსაქმიანობის შესახებ სრულყოფილი ინფორმაცია არ მიუთითა სამტრედიის საკრებულოს თავმჯდომარის მოადგილემ, კობა ძიძიგურმა, რომელიც სოლიდური კომპანია "ზანდოს" დამფუძნებელი, ხელმძღვანელი და პარტნიორია.

ბიზნესსაქმიანობის შესახებ ინფორმაცია არ მიუთითა საკრებულოს ფრაქცია "ქართული ოცნების" თავმჯდომარემ, ლიზა კრავეიშვილმაც, რომელიც შპს "ფეიქარის" 23%-იანი წილის მფლობელია.

საკრებულოს განათლების, კულტურის, სპორტისა და ახალგაზრდულ საკითხთა კომისიის თავმჯდომარემ, ბადრი შენგელიამ დეკლარაციაში არ ჩაწერა, რომ იგი "ღანირი 2"-ის 30%-იანი წილის მფლობელია.

ფრაქცია "ქართული ოცნების" დეპუტატმა, ტარიელ დვალიშვილმა ასევ, არ მიუთითა, რომ მისი მეუღლის სახელზე ბინა და მიწის ნაკვეთია გაფორმებული.
საკუთარი ბიზნესი დამალა სამტრედიის მერმა, ვალერიანე ფოცხვერიამაც. კვლევის მიხედვით, ფოცხვერია შპს "ელიტა 5+" ში 20%-ს ფლობს.

მეუღლეების ბიზნესსაქმიანობის შესახებ დეკლარაციაში არ მიუთითეს მერიის ქონების მართვისა და არქიტექტურის სამსახურების უფროსებმა.

არასამთავრობო ორგანიზაციამ ერთი დარღვევა იპოვა ვანის მუნიციპალიტეტში. კერძოდ, ვანის საკრებულოს თავმჯდომარემ, გიორგი ივანიაძემ დეკლარაციაში არ მიუთითა, რომ მისი მეუღლე ვანში მდებარე საცხოვრებელი სახლის თანამესაკუთრეა.

მეუღლის ბიზნესსაქმიანობა დამალა ტყიბულის მერმაც, თემურ ჩუბინიძემ. მისი მეუღლე ნინო ცირეკიძე შპს "სამთო საინვესტიციო კორპორაციაში" 7%-იან წილს ფლობს.

საფინანსო საბიუჯეტო სამსახურის უფროსმა, ვახტანგ გვენეტაძემ დეკლარაციაში არ დაწერა, რომ შპს "ცხრა ჯვარი 2009"-ში 20%-იანი წილი ეკუთვნის.

დეკლარაციაში საკუთარი კომპანიის შესახებ მიუთითა ეკონომიკის სამსახურის უფროსმა, ალეკო ფანჩულიძემ. თუმცა, თანამდებობის დაკავების შემდეგაც მას კომპანიაში მისი წილი მართვის უფლებით არავისთვის გადაუცია.

დეკლარაცია სრულყოფილად შეავსეს ტყიბულის მერიის აუდიტისა და ადმინისტრაციული სამსახურების უფროსებმა,  ოლეგ ქარქაშაძემდა კობა  რობაქიძემ, თუმცა, კვლევის მიხედვით, ოლეგ ქარქაშაძეს თანამდებობის დაკავებამდე  ტყიბულის მუნიციპალიტეტის ააიპთან 19 ხელშეკრულება აქვს დადებული. თანამდებობაზე დანიშვნის შემდეგ კი, მისი ბიზნესსაქმიანობა მისმა მეუღლემ გააგრძელა, რომელსაც 2015 წელს მუნიციპალიტეტთან 4 გამარტივებული შესყიდვა აქვს გაფორმებული.

ტყიბულის მუნიციპალიტეტის კონტრაქტორი იყო კობა რობაქიძეც. მას ადმინისტრაციული 
სამსახურის უფროსის თანამდებობის 
დაკავებამდე, მუნიციპალიტეტთან 3 ხელშეკრულება აქვს გაფორმებული.

ქონებრივ დეკლარაციაში საკუთარი შემოსავლები სრულად არ მიუთითა არც ტყიბულის საკრებულოს ორმა დეპუტატმა: თეიმურაზ ქელბაქიანმა და იოსებ რობაქიძემ.

არასამთავრობო ორგანიზაცია "საერთაშორისო გამჭვირვალობა-საქართველო" მიიჩნევს, რომ შესწავლის შედეგად გამოვლენილი ფაქტები, წარმოადგენს "საჯარო სამსახურში ინტერესთა შეუთავსებლობისა და კორუფციის შესახებ კანონის მე-13 მუხლის დარღვევას, რომლის მიხედვითაც, საჯარო მოხელეს უფლება არ აქვს ასრულებდეს რაიმე ანაზღაურებად სამუშაოს, (გარდა სამეცნიერო, პედაგოგიური ან შემოქმედებითი საქმიანობისა), ეკავოს სხვა თანამდებობა რომელიმე საჯარო დაწესებულებაში ან კერძო სამართლის იურიდიულ პირში.

ამავე თემაზე:

ხარვეზი თუ ქონების დამალვის მცდელობა - საჯარო მოხელეების არასრული დეკლარაციები (გადაცემა)

საჯარო მოხელეები, რომლებსაც დეკლარაციებში ქონების შეტანა "დაავიწყდათ" , შესაძლოა, დაჯარიმდნენ

ზესტაფონში მერიის ერთ-ერთი სამსახურის უფროსი 1 000 ლარით დააჯარიმეს