საქართველოს პარლამენტის საქმიანობის გამჭვირვალობა, ინფორმაციის ხელმისაწვდომობა და მოქალაქეების ჩართულობა - ამ მიზნებს უნდა მიაღწიოს საქართველოს პარლამენტმა "ღია მმართველობის პარტნიორობის" ფარგლებში.
ღია და გამჭვირვალე პარლამენტის 2018-2019 წლების სამოქმედო გეგმაზე ქუთაისში იმსჯელეს.

შეხვედრას ქუთაისის მაჟორიტარი დეპუტატი, გენადი მარგველაშვილი, ადგილობრივი თვითმმართველობის წარმომადგენლები, სტუდენტები და სკოლის მოსწავლეები ესწრებოდნენ.

ინიციატივის ფარგლებში საქართველოს პარლამენტის ოფიციალურ ვებ-გვერდზე უკვე დაინერგა მოქალაქეთა ჩართულობისა და ინფორმაციის ხელმისაწვდომობის უზრუნველყოფის რამდენიმე მექანიზმი.

ღია და გამჭვირვალე მმართველობის მუდმივმოქმედი საპარლამენტო საბჭოს თავმჯდომარის, ირინა ფრუიძის თქმით, მოქალაქეებს უკვე შეუძლიათ თავიანთი აზრი გამოთქვან კონკრეტულ კანონპროექტზე, ელექტრონულად გააგზავნონ პეტიცია ან საკანონმდებლო ინიციატივა პარლამენტში. გაფართოვდა პარლამენტის საქმიანობის შესახებ, პროაქტიულად გამოსაქვეყნებელი ინფორმაციის ჩამონათვალი, მოქალქისთვის გამარტივდა პარლამენტის შენობაში შესვლა და კომიტეტების სხდომებზე დასწრება, მოხდა პარლამენტის წევრის ქცევის კოდექსის ინიცირება.

"როცა საქართველოს პარლამენტი ჩაერთო ამ ინიციატივაში, აღმოვაჩინეთ, რომ პარლამენტის გვერდზე ვერ იპოვიდით ინფორმაციას მაჟორიტარი დეპუტატების შესახებ, ასევე, მოქალაქეს ამ დრომდე არ ჰქონდა შესაძლებლობა აქტიურად მიეღო მონაწილეობა კონკრეტული კანონპროექტის განხილვაში. უკვე ყველას შეუძლია კომენტარი დატოვოს ამა თუ იმ კანონპროექტის შესახებ. ახლა ვმუშაობთ უკუკავშირის მექანიზმებზეც, რომ მოქალაქის კომენტარი არ დარჩეს კომენტარად", - ამბობს ირინა ფრუიძე.

"ღია მმართველობის პარტნიორობას" საქართველოს პარლამენტი 2010 წელს შეუერთდა. ინიციატივას 76 წევრი ქვეყანა ჰყავს. 2017 წელს საქართველო ერთი წლის ვადით, პარტნიორობის თავმჯდომარე ქვეყანა გახდა.

მიმდინარე წლის 19 ივლისს კი საქართველო "ღია მმართველობის პარტნიორობის" გლობალურ სამიტს უმასპინძლებს.