აკაკი წერეთლის სახელმწიფო უნივერსიტეტის სტუდენტებს სწავლის თანხის ნაწილი მიმდინარე წლის დეკემბრის ბოლოსთვის დაუფინანსდებათ. სასწავლებლის  სტუდენტურ თვითმმართველობაში  განმარტავენ, რომ სწავლის დაფინანსების სურვილი 200-მდე სტუდენტმა გამოთქვა.

"საკმაოდ ბევრი განაცხადი შემოვიდა. ახლა შერჩევა მიმდინარეობს და ვფიქრობთ, რომ დეკემბრის ბოლოს უკვე სტუდენტებს სწავლის გადასახადის ნაწილს დავუფინანსებთ",  - ამბობს წერეთლის უნივერსიტეტის სტუდენტური თვითმმართველობის პრეზიდენტი, გიორგი ოკრიბელაშვილი.

სწავლის თანხა იმ სტუდენტებს დაუფინანსდებათ, რომლებიც რეგისტრირებულნი არიან სოციალურად დაუცველთა ერთიან ბაზაში, ცოლ-ქმარი ან დედმამიშვილი, საქართველოს ტერიოტრიაზე იძულებით გადაადგილებული და დედით ან მამით ობოლი.

სწავლის დაფინანსების მინიმალური თანხა არის 100, ხოლო მაქსიმალური 300 ლარი იქნება. მსგავსი პროექტი აკაკი წერეთლის სახელმწიფო უნივერსიტეტში 2016-2017 სასწავლო წელსაც განხორციელდა. სტუდენტური თვითმმართველობის პრეზიდენტის თქმით, გასულ წელს ეს პროექტი ორივე სემესტრში განხორციელდა. სულ 154-მდე სტუდენტს დაუფინანსდა სწავლის გადასახადი, რისთვისაც სასწავლებლის ბიუჯეტიდან 40 000 ლარამდე თანხა დაიხარჯა.